دبدوب
شعر:خميس نصر
يا دبدوب يابو الدباديب
يابو شكل مميز وعجيب
لا بتفطر يوم ولا تتغدى
ولا حتى تدوق المشاريب
أنا باصحى بدري من النوم
باتوضى والبس في هدوم
بصلاتي ببدأ في اليوم
وافطر بسكوت ويا حليب
وسعادتك نايم كسلان
رغم انك شكلك فنان
مستني أسامة وأفنان
يلعبوا وياك معزة وديب
ما تقوللي مشكلتك إيه؟
ليه ساكت ومكتم ليه؟
ما تفضفض يا سعادة البيه
واحكي وقول يابو الدباديب
قاللي يا قمرة ياقمورة
أنا حبة صوف محشورة
ودماغي مجرد كورة
وخيوط مرصوصة بترتيب
مصنوعة بإيد الفنان
وانت بإيد رب الأكوان
أنا لعبة وانت الإنسان
عن طاعة ربك ما تغيب
